S Läbe fahrt im Taktfahrplan verbi.
All die Mäntsche im 46er,
en jede hät sini Gschicht.
Er chunt vo irgendwo hèr
und will no nöimed ane.
Numen èr zündet sich e witeri Zigaretten a.
Genau wied Büss gaht au sie Zug um Zug verbi.
D Lüt wo verbilaufed gsehnd en nöd,
sie sind gfange in ihrne Gedanke.
Genau wied Buspassagier
wo sicher umgäh vor blauwisse Carosserie anem verbi fahred,
unterwägs an Ort wos angehöred.

Numen èr isch unterwägs verlore gange.
Irgendwänn isch èr am Tüfel ab em Charre gheit.
Öb èr det sini Bei verlore hät weiss èr nüme.
Er sitzt jetzt da und wartet uf de nächschti Bus
und zündet sich e witeri Zigi a.
Er söll nöd eso vill Rauche hät d Rosie gseit.
Öbs geschter gsi isch oder ersch vor drü 46er weiss èr nüme.
D Zigis won èr im Takt vo de Büs raucht
sind em als einzigs no blibe.
Sini Lunge sind sicher efäng so teered wied Nordstrass
wos Läbe im Taktfahrplan anem verbifahrt.
Wenigschtens chan èr sitze und em debi zueluege.

Er lupft amigs d Hand und winkt em, wänns anem verbirösslet.
Die einte Chauffeure winket, anderi hupet, eine rüeft em übers Mik «Ciao Sepp!» zue.
En Bus, das isch no öppis, mit all dem Läbe drin, wo no muess passiere.
Aber èr, èr ghört da ane, das isch sin Platz.
Er zündet sich e witeri Zigi a. Dä nächscht 46er chunnt i zwei Minute.
Am Namittag chömeds all 8 Minute, gäge de Abig sogar im 5 Minutetakt.
Aber dänn staht Milchris uf em Spisplan.
Und nach eme Bad isch èr versorget im Bett.
Er weiss, dass d Büss dänn all 12 Minute fahred.
Und am Morge, wänns wieder im 8er-Takt fahred,
sitzt èr wieder a sim Platz und raucht
und winkt am Läbe zue, wänns anem verbifahrt.

für Hans Mosimann, 1948 – 2010

zum Blogbeitrag Ciao Sepp – 19. Februar 2010

zur Lyrics-Sélection
zu den drei neusten Gedichten, Songs und Gebeten
Lyrics

zurück zur Startseite